సత్యసాయి సేవలు ఆదర్శప్రాయం

యువతకు కలెక్టర్ పిలుపు

తిరుపతి, నవంబర్ 23: భగవాన్ శ్రీ సత్యసాయి బాబా చేసిన సేవలు ప్రపంచానికే ఆదర్శనీయమని తిరుపతి జిల్లా కలెక్టర్ డాక్టర్ వెంకటేశ్వర్లు కొనియాడారు. శ్రీ సత్యసాయి శతజయంతి ఉత్సవాల్లో భాగంగా పద్మావతి నగర్‌లో రాష్ట్ర ప్రభుత్వం, సత్యసాయి సేవా సమితి ఆధ్వర్యంలో నిర్వహించిన కార్యక్రమంలో ముఖ్య అతిథిగా పాల్గొన్న ఆయన ఈ మేరకు ప్రసంగించారు.
ప్రతి వ్యక్తి సమాజ సేవ చేయాలని, ముఖ్యంగా యువత ఈ దిశగా అడుగులు వేయాలని కలెక్టర్ పిలుపునిచ్చారు. సేవే మానవ జన్మ సార్థకత అని, “సేవే లక్ష్యం.. సేవే మార్గం” అన్న బాబా సందేశాన్ని అందరూ ఆచరణలో పెట్టాలని ఆయన కోరారు. సత్యసాయి సేవా ట్రస్ట్ చేపట్టిన నీటి ప్రాజెక్టులు, అత్యాధునిక ఆస్పత్రులు, ఉచిత వైద్యం, విద్యా సేవలు వెలకట్టలేని మహత్కార్యాలని కలెక్టర్ అభివర్ణించారు. ముఖ్యంగా అనంతపురం జిల్లాలో కరవు బారిన పడిన వందలాది గ్రామాలకు శుద్ధ తాగునీరు అందించిన సేవ ఎప్పటికీ మరచిపోలేనిదని ఆయన గుర్తుచేసుకున్నారు. తాను ఐఏఎస్ శిక్షణ కాలంలోనే పుట్టపర్తి సేవా కార్యక్రమాలను దగ్గరగా చూశానని, తమ కుటుంబ సభ్యులు కూడా అక్కడి వైద్య సేవలు అనేకసార్లు పొందారని కలెక్టర్ భావోద్వేగంగా తెలిపారు. రాష్ట్రవ్యాప్తంగా ప్రతి జిల్లా, మండలం, మున్సిపాలిటీలో సత్యసాయి సేవా సమితి, ప్రభుత్వ శాఖల సమన్వయంతో నిర్వహిస్తున్న సేవా కార్యక్రమాలు అభినందనీయమని పేర్కొన్నారు. ఈ మహోన్నత సేవలకు సహకరిస్తున్న సత్యసాయి సేవా సమితికి హృదయపూర్వక కృతజ్ఞతలు తెలిపిన కలెక్టర్, ఇలాంటి కార్యక్రమాలు రాష్ట్రంలో మరింత విస్తృతంగా కొనసాగాలని ఆకాంక్షించారు. కార్యక్రమంలో సేవా సమితి కన్వీనర్ చక్రవర్తి, జాయింట్ కన్వీనర్ మురళి, సభ్యులు రెడ్డి ప్రసాద్, అనురాధ తదితరులతోపాటు పలువురు భక్తులు, సేవకులు పాల్గొన్నారు. అనంతరం అన్నదాన కార్యక్రమం ఘనంగా జరిగింది.

Hashtags:
#SathyaSaiBaba #SaiCentenary #ServiceToSociety #Tirupati #YouthForSeva #SathyaSaiSevaSamithi #JaiSaiRam