తిరుపతి, నవంబర్ 23 : తిరుచానూరు శ్రీ పద్మావతి అమ్మవారి కార్తీక బ్రహ్మోత్సవాల్లో అంతిమ రోజైన నవంబరు 25వ తేదీ మంగళవారం జరగనున్న పంచమీ తీర్థం (చక్రస్నానం) కోసం టీటీడీ అఖండ ఏర్పాట్లు పూర్తి చేసింది. లక్షలాది మంది భక్తులు ఒక్కరోజే పద్మసరోవరంలో పుణ్యస్నానం ఆచరించే ఈ మహోత్సవానికి అన్ని రంగాల్లో పటిష్ట ఏర్పాట్లు చేపట్టినట్లు టీటీడీ అధికారులు తెలిపారు. ఇంజినీరింగ్ విభాగం క్యూలైన్లు, బ్యారికేడ్లు, పద్మపుష్కరిణి ప్రవేశ నిష్క్రమణ గేట్లు, సూచిక బోర్డులు సహా అన్ని పనులు పూర్తి చేసింది. భద్రత కోసం టీటీడీ సెక్యూరిటీ 600 మంది, స్కౌట్స్, గైడ్స్ 200, ఎన్సీసీ విద్యార్థులు 200, శ్రీవారి సేవకులు 900 మందితోపాటు పోలీసు సిబ్బంది 1,600 మందిని మొత్తం 3,700 మందికిపైగా బందోబస్తుకు రంగం సిద్ధం చేశారు. భక్తుల సౌకర్యార్థం 150 అన్నప్రసాదం కౌంటర్లు ఏర్పాటు చేశారు. తోళ్ళప్ప గార్డెన్స్లో 50, ఎస్వీ హైస్కూల్ వద్ద 15, నవజీవన్ ఆసుపత్రి (అయ్యప్పస్వామి ఆలయం) వద్ద 45, పూడి ఏరియాలో 25, గేట్-4లో ఎమర్జెన్సీ కోసం 15 కౌంటర్లలో పంపిణీ జరుగనుంది. క్యూలైన్లలో త్రాగునీరు, మజ్జిగ, అల్పాహారం కూడా అందిస్తారు.
పారిశుద్ధ్యం కోసం 284 శాశ్వత, తాత్కాలిక, మొబైల్ మరుగుదొడ్లతోపాటు అదనపు సిబ్బందిని నియమించారు. వైద్య ఏర్పాట్లలో 3 ప్రథమ చికిత్స కేంద్రాలు, 5 అంబులెన్స్లు, స్విమ్స్-రుయా ఆసుపత్రుల వైద్యులు, ఆయుర్వేద వైద్యులు, ఫైర్ & ఎన్డీఆర్ఎఫ్ బృందాలు అందుబాటులో ఉంటాయి. పార్కింగ్ కోసం శిల్పారామం, తనపల్లి క్రాస్, మార్కెట్యార్డు, రామానాయుడు కళ్యాణ మండపం, పూడి జంక్షన్, దళితవాడ సహా ఆరు ప్రాంతాల్లో వాహనాల స్థలం కేటాయించారు. ప్రముఖులకు పంచాయతీ కార్యాలయం ఎదురుగా ప్రత్యేక పార్కింగ్ ఏర్పాటు చేశారు.
పంచమీ తీర్థం దృశ్యాలను ప్రసారం చేయడానికి ఇప్పటికే 25 ఎల్ఈడీ స్క్రీన్లతోపాటు రేపు అదనంగా 34 (హోల్డింగ్ పాయింట్ల వద్ద) + 4 (పద్మసరోవరం వద్ద) మొత్తం 63 స్క్రీన్లు పనిచేస్తాయి. ఎస్వీబీసీ ద్వారా ప్రత్యక్ష ప్రసారం కూడా ఉంటుంది. భక్తులు జడ్పీ హైస్కూల్, పూడి ఏరియా, నవజీవన్ ఆసుపత్రి సమీపంలోని మూడు హోల్డింగ్ పాయింట్ల నుంచి మాత్రమే పద్మసరోవరానికి చేరుకోవాలని టీటీడీ స్పష్టం చేసింది. మధ్యాహ్నం 12:10 గంటలకు కుంభలగ్నంలో అర్చకులు చక్రస్నానం శాస్త్రోక్తంగా నిర్వహిస్తారు. పంచమీ తీర్థం ప్రభావం రోజంతా ఉంటుందని, భక్తులు సంయమనంతో పుణ్యస్నానం ఆచరించాలని టీటీడీ విజ్ఞప్తి చేసింది.
Hashtags:
#PanchamiTheertham #Tiruchanur #PadmavathiAmmavari #Chakrasnanam #TTD #Brahmotsavam2025 #JaiPadmavathi #TirupatiTemples #SrivariSevakulu
About the Author
